Natalana nga pasakaan sang kaso ang driver sang duha ka mga tricycle nga nagabungguanay sa access road malapit sa Lumina Homes sa Brgy. Vista Alegre, Bacolod City, Sabado sang gab-i.
Sa interview sang Bombo Radyo Bacolod kay Police Capt. Eufracio Javines, hepe sang Bacolod City Police Station 7, duha ka tricycle ang nainvolve sa aksidente nga nagluntad sa nasambit nga lugar.
Ang isa ka tricycle ang nagabiyahe west to east nga direction nga ginamaneho ni Nemuel Perolino, residente sang Purok Sabes, Barangay Villamonte, Bacolod City.
Nagasakay sa tricycle ang mga biktima nga kanday Patrolman Ivan Ray Dela Cruz, naassign sa Boracay Police Station sa Malay, Aklan; Shalina Villanueva sang Barangay, Villamonte; kag Cinderella Ganzin kag residente sang Lumina Homes sa Barangay Vista Alegre.
Ang isa naman nga tricycle ang nagabiyahe sa east to west nga direction kag ginamaneho ni Fernan Agolino apang wala sang sakay.
Nagbungguanay ang duha ka tricycle nga nagtuga sa pagkasamad sang tatlo ka pasahero kag ginhingagaw man sila dala sa Riverside Medical Center apang kahapon, nakabaton sang impormasyon si Javines nga nadulaan sang kabuhi ang pulis.
Samtang, ginsaylo naman sa regional hospital si Agolino.
Padayon ang koordinasyon sang hepe sa pamilya sang biktima agud pahibaluon sang nadangatan sini.
Ginkompirmar man sini nga duha ang pasakaan sang kaso nga kriminal bangud sila ang responsable sa krimen.
Nakahunong naman sa Bacolod City Police Station 7 si Perolino.
