Patay ang isa ka pulis matapos gintiro sang subject sa drug buybust operation sa atubang sang lodging house sa Alijis Road, Brgy Singcang Airport, Bacolod City.
Ang biktima ang ginkilala nga si Police Master Sergeant Romulo Galvez, miyembro sang Station Drug Enforcement Team (SDET)sang Bacolod Police Station 9.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, natapos na nila ang transaksyon sang poseur buyer sa 32 anyos nga subject, apang natalupangdan sini si Galvez nga nagapanago sa madulom nga bahin sang area.
Gilayon ini nga naghunos sang cal. 45 pistol kag gintiro si Galvez, nga naigo sa natuo nga paa.
Kasunod sini may nagluntad nga pagpinukutay tubtob sa nakontrolar ang suspect.
Aminado si Ofalia nga sila ang mahalong sa pagpatigayon sang operasyon bangod kilala ang suspect nga siga, kag nakahibalo man ang mga ini nga may ginahuptan nga armas luthang.
Apang wala nila ginlauman nga matalupangdan sini ang mga police security nga nagabantay sa palibot.
Pahayag ni Ofalia nga wala man sila nagpinsar nga madulaan sang kabuhi ang pulis, bangod sa hita lamang ang iya nga samad, kag malapit lamang ang ospital.
Apang ini ang gindeklarar nga napatay alas-12:08 kaina sang kaagahon matapos madulaan sang madamo nga dugo.
Sa karun, nakahunong na ang suspect sa Bacolod Police Station 9, kag narecover sa iya ang lima tanan ka sachet sang suspected marijuana, kag ang cal. 45 pistol nga gingamit sa krimen.
Ini ang mangatubang sang kaso nga murder, paglapas sa Republic Act 9165ukon Comprehensive Dangerous Drugs Act of 2002, kag illegal possession of firearms.
Nagsindi naman sang kandila ang Bacolod Police Station 9 para kay Galvez, kag napahibalo naman ang iya pamilya.
Nagapakig-unong man man ang Police Regional Office – Negros Island Region kag nagpasalig sang gilayon nga paghatag sang bulig sa pamilya.
