Patay ang intelligence officer ng Pontevedra Municipal Police Station matapos ginluthang samtang naga-jogging kaupod ang alkalde sa Reclamation Area, Barangay 1, Pontevedra, Negros Occidental kaina sang aga.
Ginkilala ang biktima kay P/Staff Sgt. Ildefonso Casugod kag residente sang amo nga banwa.
Sa interview sang Bombo Radyo Bacolod kay Pontevedra Mayor Jose Maria Alonso, ginpahayag sini nga mga lima tubtob napulo ka metro lang ang kalayuon nila ni Casugod sang natabo ang pagpangluthang.
Suno sa iya, permi siya naga-jogging sa reclamation area sa likod lang sang municipal hall kada aga kag masami man sini nagakadungan si Casugod.
Dugang pa sang alkalde, nagalakat lamang ang wala pa nahibaluan nga suspetsado nga nagasuksok sang duag asul nga jacket nga may hood kag face mask sang gintiro sini sa ulo ang pulis nga nangin tunaan sang iya kamatayon.
Matapos sini nga ginluthang si Casugod, nagpalagyo ang suspek sakay sa iya nga motorsiklo.
Suno naman kay P/Capt. Hancel Lumandaz, hepe sang Pontevedra Municipal Police Station, ginpahayag sini nga padayon karon ang ila imbestigasyon sa insidente.
Pila sa mga ginatutukan nila nga motibo amo ang may kaangtanan sa trabaho sini bilang pulis kag personal nga hiligut-anon.
Indi man sini makumpirmar kun may kaangtanan sa iligal nga druga si Casugod.
Apang suno kay Lumandaz, mapisan nga klase sang pulis ang biktima bisan tatlo pa lang siya ka bulan nga hepe sa amo nga police station.
Ginpasalig naman sini nga himuon nila ang tanan agud nga mahatagan sang hustisya ang kamatayon ni Casugod.
