Siyam na ka tuig nga ginahimo sang isa ka pulis ang pagpananom sang sunflower nga ginapanagtag kada Valentine’s day, bilang kabahin sang iya personal nga adbokasiya.
Sa interview sang Bombo Radyo Bacolod kay Police Lieutenant Colonel Alvimar Flores, hepe sang Sagay City Police Station, nagsugod ini sang 2017 sang nagtanom siya sang mga liso sang sunflower gikan pa sa Mindoro.
Suno diri, mahilig ang ila pamilya sa mga bulak gani may-ara ini sang sunflower farm sa La Carlota City.
Sa ginpatigayon nga checkpoint sang Sagay City Police Station kahapon, adlaw sang tagipusuon, nagpanagtag sila sang sunflower sa mga motorista kag mga empleyado sang lokal nga panguluhan sang Sagay City.
Suno kay Flores, ang ini nga aktibidad ang mahimo mangin simbolo sang maayo nga intensyon kag pagpabakod sang relasyon sang kapulisan sa komunidad.
Pahayag niya, indi dapat kahadlukan ang mga ginapatigayon nga checkpoint sang kapulisan.
Para kay Flores, importante nga mabag-o ang negatibo nga imahe sang komunidad batok sa kapulisan.
Sa karon, nagaplano si Flores nga maghulam sang isa ka duta kag magtanom sa Sagay City sang sunflower.
Ginalauman nga mapatubo ang sunflower farm sa bulan sang Hunyo para sa dugang man nga atraksyon sang ciudad.
