Liwat na nga magabukas sa publiko ang puerto sa banwa sang Pulupandan, Negros Occidental matapos nga ginturn-over kahapon sa Global Port Terminal Incorporated ang operasyon kag management sang nasambit nga Sea Port.
Suno kay Engr. Nelson Caabay Jr., acting port manager sa Philippine Port Authority (PAA) – Bacolod/Negros Occidental, ginapanag-iyahan gihapon sang gobyerno ang Pulupandan Port apang ginhatag na ang 15-years concession sa pribado nga kompanya bangod ini ang nagdaog sa bidding nga ginpatigayon sang Desyembre 2021 sa balor nga P537 million.
Suno kay Caabay, bentaha ini gihapon para sa Philippine Port Authority sa pag-operar kag pagmanage sang Global Port Terminal Inc. ang nauntat na sa operasyon nga puerto ang liwat na nga mabuhi kag makapatigayon sang byahe.
Ini ang pagadungkaan sang mga passenger kag cargo vessels nga magalayag padulong sa Guimaras, Panay Island, kasubong man sa Metro Manila kag nadugangan pa sang mga International trips.
Suno kay Caabay, pinaagi sini magluwas sa Bredco kag Banago Port, may dugang na nga opsyon ang mga pumuluyo ilabi na ang mga yara sa Sur nga bahin sang probinsya.
Nahibaluan nga ang Pulupandan Port ang nagsarado antes paman ang COVID-19 pandemic.
Nagasalig naman ang Philippine Port Authority nga mas may ikasarang ang pribado nga kompanya kag may expertise sa port operations.
Ang papel sang PPA amo ang pagsupervise samtang ang ahensya ang magabatun naman sang tuigan nga concession fee sa sulod sang 15 ka tuig.
Sa karun nakadepende pa sa marketing plan sang Global Port Terminal Inc kun san-o umpisahan ang pagbukas sang Pulupandan Port.
Nagalaum naman si Caabay nga pinaagi sa pagbukas sang Puerto, mabalik ang pag-uswag sang Pulupandan nga sadto amo ang nagapanguna nga Sea Port sa Negros Occidental.
