Nagahingyo ang mga pumuluyo sa Purok Fire, Brgy. 8, Bacolod City nga mahatagan sila sang alagyan bangud wala sila sang malabayan padulong sa dalan ingkaso nga may magluntad nga emerhensya.
Madumduman nga ginpasirado ang dalan kag pila man ka mga balay ang nademolish lakip na ang barangay hall bangud sa expansion sang Bureau of Fire Protection (BFP) building sa nasambit nga lugar.
Sa interview sang Bombo Radyo kay Roel Villacana, residente sang Purok Fire, Barangay 8, ginpahayag sini nga right of way man lang ang ila ginapangayo bangud kun may magluntad nga emerhensya kaangay sang sunog, makaluluoy gid sila bangud wala sila sang agyan pagwa.
Suno diri, wala-tuo ang alagyan sang una apang subong, wala na sila sang may malabyan gani nagapangayo ini sang bisan gamay man lang nga konsiderasyon.
Nagpanawagan man ini kay Bacolod Fire Marshal Chief Insp. Publio Ploteña nga kun luyag sini kuntani nga magbulig sa mga pumuluyo, sarang niya ini nga mahimo bangud siya ang may otoridad.
Ginpahayag man ni Punong Barangay Joan Magalona nga nakaistoryahanay na sila ni Ploteña kag magaayo ini sa regional director sang BFP kun ano ang sarang nga mahimo.
Suno kay Magalona, ginpahayag sang fire marshal nga nagasunod lamang sila sa mandu bangud manugtapos na ang nasambit nga expansion.
Nagkadto man ang punong barangay sa Bacolod Government Center kag nag-ayo nga hatagan sila bisan temporaryo lang nga alagyan bangud mabudlay gid ang sitwasyon sang pumuluyo ilabi na ang mga senior citizens kun may magluntad nga sunog ukon baha.
Suno sa iya, ginpasugtan naman ini sang gobyerno apang temporaryo lamang.
Suno diri, sang iya ini ginpadangat sa mga pumuluyo, nagkalma na sila kag iya ginlaygayan kag ginpaintindi ang mga ini nga indi madala sa pwersahanay ang ila hingyo.
