Gindayaw sang Punong Barangay sa Brgy Granada, Bacolod City ang pagpatuman sang 5-minute response policy sang kapulisan, apang aminado nga ini ang indi aplikable sa ila Barangay.
Madumduman nga sa simulation exercise sang Bacolod City Police Office, gin-imbetar ang mga Punong Barangay agud mawitness ang kapasidad sang kapulisan sa pagtuman sa mandato sang PNP Chief.
Sa interview sang Bombo Radyo Bacolod kay Punong Barangay Armando Vito, nagadangat sa 3,000 hectares ang kalaparon sang Brgy Granada kag ini ang ginabug-usan sang 22 ka Purok, 23 ka Hacienda kag 12 ka subdivision.
Pahayag sini nga agricultural land ang mayorya sang Barangay gani malagka man ang grupo sang mga pamalay.
Nagapati si Vito nga sa urban areas lamang aplikable ang 5-minute response policy kaangay sa sentro sang Bacolod City, bangod tuluparay lamang ang mga Barangay.
Ini ang mabudlay na nga ipatuman sa Brgy Granada bangod man sa ila kaingod sa Brgy Alangilan.
Suno kay Vito, madamo sa ila mga Purok ang palarehas ang pangalan kag may gamay lamang nga pagbag-o gani kun indi maathag ang pag-eksplikar sang magatawag sa 911, mahimo magtalang-talang ang mga kapulisan.
Dugang pa sa concern sini kun may una na nga ginaresponderan kag may magpanawag sang police assistance sa mas malayo nga lugar.
Isa pa sa kahangawa sini kun may-ara sang magapanawag, apang may tinutuyo nga i-ambush ang kapulisan ilabi na nga duha lamang ka pulis ang masami nagaresponder, samtang madamo sang area sa Brgy Granada nga suludlon.
Suno kay Vito, nanamian gid ini sa 5-minute response policy bangod madasig ang pagresponder, apang bangod indi ini aplikable sa ila Barangay luyag sini nga liwat makahinun-anon sa BCPO officials agud makahatag man sang rekomendasyon kung sarang ma-exempt ang ila Barangay kag maka-implementar sang lain nga mga pamaagi para sa police response.
