Ginpasalig sang Punong Barangay sa Brgy 27, Bacolod City nga pangitaan sini sang paagi nga makakwa sang business permit ang mga nagabaligya sang furnitures sa kilid sang dalan.
Ini matapos nagpagwa sang anunsyo ang Bacolod City Legal Office nga pangsirad-an na lamang ang mga furniture shop bangod wala sang business permit kag sa pasulit-sulit nga violations.
Sa interview sang Bombo Radyo Bacolod kay Punong Barangay Freeman Madalag, una sini nga ginsolusyonan ang reklamo, nga wala na sang sidewalk bangod sa mga baligya nga nagalaksam na tubtob sa dalan.
Temprano pa sini nga ginpadulungan ang mga furnitures shop nga tadlungon ang ila produkto matapos ang warning, kag bisan ang mga nakapark sa dalan nga salakyan nga gamit sa pagkarga sang mga furnitures ang iya man nga ginpahimos.
Apang aminado si Madalag nga tatlo lamang sa furniture makers nga residente sa ila Barangay ang may business permit, samtang indi naman makakuha ang 19.
Ini bangod indi kaangay sa tatlo nga titulado ang pwesto, wala naman sang land title ang 19 ka furniture shop, nga kinahanglan sa pagkuha sang business permit.
Pasalig ni Madalag nga pangitaan sini sang paagi nga makakuha sang business permits ang iya mga constituents.
Ginhangkat naman ni Atty Karol Joseph Chiu si Madalag nga pamatud-an ang iya nga ginpasalig.
Apang pahanumdom man ni Madalag nga indi lamang taga-Brgy 27 ang nagapasaway nga vendor sa nasambit nga dalan, bangod iban diri ang gikan sa Brgy 20 kag 23.
