Padayon nga lagson sang complainant ang mga respondents bangud ang mga ini ang wala pa nakabayad sang ila gin-utang.
Nahibaluan, ginsuspend sang Office of the Ombudsman sanday Punong Barangay Hercy Sibug, Barangay Kagawad Bernabe Sibug kag Barangay Treasurer Edmar Base sang tatlo ka bulan nga wala sang sweldo bangud sa simple misconduct.
Ini matapos nga may yara sang substantial evidence nga nakita ang ahensya bilang pamatuod sa reklamo sang complainant.
Sa interview kay Atty. John Kaye Delostrico, legal counsel sang complainant, sa desisyon nga ginpagwa sang Ombudsman, Simple Misconduct lang ang ginapangatubang sang tatlo ka Barangay Officials sang Barangay 7.
Apang ang ginfile nila nga kaso sang iya kliyente nga si Cresensiano Torres batok sa tatlo sang Hunyo 2023, amo ang conduct prejudicial to service, abuse of authority kag grave misconduct.
Suno sa abugado, sang 2019 nagpangutang ang mga nasambit nga barangay officials kay Torres sang P140 mil para sa sweldo sang barangay council and employees lakip na ang mga tanod kag barangay health workers.
Suno diri, tubtob sa karun ang iya kliyente ang wala pagid nabayaran nanday Sibug kag Base.
Sang 2020, ang nasambit nga mga opisyales ang nag-issue sang tseke kay Torres nga kumpleto sang mga pangalan sang mga opisyales, pirma kag tanan nga kinahanglan nga detalye.
Ang tseke ang iya sang Land Bank kag yara sa idalom sang account sang Barangay 7.
Suno kay Delostrico, sang gin-in cash na sang iya kliyente ang tseke, nagtalbog ini.
Ini man ang nangin ugat nga ginpasakaan sang kaso ni Torres ang mga nasambit nga mga opisyales.
Pero sa counter-affidavit sang respondents, ila ginpanginwala nga ang ginutang ang para sa sweldo sang mga personnel sang Barangay.
Nagpasiguro ang respondents nga bayaran ang utang sa sulod sang isa ka bulan apang napaslawan.
Sa pihak sang desisyon nga ginpanaog sang Ombudsman sa mga respondents, lagson sagihapon sang complainant ang mga ini bangud wala pa ini nabayaran sang gin-utang sa iya nga P140,000.00.
