Gin-athag sang punong barangay sang Barangay Felisa, Bacolod City nga nagpahibalo lang sa pamilya sang COVID patient ang miyembro sang Barangay Health Emergency Response Team (BHERT) nga manugpadulong na ang extraction team sang City Disaster Risk Reduction and Management Office agud kuhaon ang pasyente.
Madumduman nga may yara sang nagviral nga video sang weekend kun sa diin makit-an ang pila ka mga miyembro sang BHERT sa Barangay Felisa nga wala naka-PPE kag may yara sang naka-shorts lang.
Sa interview sang Bombo Radyo Bacolod kay Punong Barangay Ramon Jardin, ginpaathag sini nga naglabay lang ang BHERT sa amo nga puluy-an agud kuntani magpabalo nga padulong na ang extraction team agud kuhaon ang iloy nga nagpositibo.
Apang imbes magkooperar, ginyawyaw sang pila ka miyembro sang amo nga pamilya lakip na ang nagpositibo nga iloy ang mga health workers bangud wala ang mga ini naka-PPE.
Suno kay Jardin, naka-istorya naman sini ang bata sang pasyente kag iya man naintindihan nga resulta lamang ini sang emosyon sang pamilya.
Samtang, aminado naman si Mayla Quinit, miyembro sang BHERT, nga wala ini naglaom nga magadangat sila sa amo nga sitwasyon.
Suno sa iya, nagkadto lamang sila sa balay sang pasyente agud magpahibalo kuntani nga padulong na ang extraction team kag nagdul-ong pa sila sang food packs.
Naintindihan man sini ang nangin reaksyon sang pamilya bangud suno sa iya kabahin na ini sang ila nga trabaho.
Suno kay Quinit, nagpositibo sa coronavirus ang iloy sadtong Nobyembre 21 matapos ginswab test sang Nobyembre 19.
Una nga nagpositibo sa ila nga pamilya ang iya nga bata nga nagabusong sadtong Nobyembre 17.
Gin-swab test ang bilog sini nga pamilya bilang kabahin sang contact tracing kag nagpositibo ang iloy.
