Ginpasakaan sang Criminal Investigation and Detection Group (CIDG) sang kaso ang punong barangay kag tatlo ka iban pa nga opisyales sang Barangay 19, Bacolod City matapos nga napamatud-an ang reklamo sang mga residente nga may yara sang anomaliya sa pagpanagtag sang Social Amelioration Program (SAP).
Sa interview sang Bombo Radyo Bacolod kay Police Chief Master Sergeant Ramiro Gocotano, Officer in Charge sang CIDG-Bacolod, ginpahayag sini nga ginfilan sang kaso sa Hall of Justice sa ciudad sang Bacolod sanday Punong Barangay Kim C. Piramo, Barangay Secretary Joemarie Cordeta, Barangay Treasurer Raiza Fronda, kag (BHW/Brgy. Nutrition Scholar nga si Jean Doromal kasunod sang mga natipon nga ebidensya batok sa ila.
Ang mga ini ang nagapangatubang sang kaso nga paglapas sa RA 6713 ukon code of conduct and ethical standards for public officials and employees; RA 3019 ukon Graft Corrupt Practices Act kag RA11469 ukon Bayanihan to Heal as One Act.
Suno kay Gocotano, ini ang kasunod sang alegasyon nga gin-una pa ni Piramo ang pamilya sini komparar sa labi nga nagakinahanglan sang ayuda.
Samtang suno kay Juvy Hofileña, tagreklamo kag residente sang nasambit nga Barangay, gin-ako ni Punong Barangay Kim Piramo nga siya ang nag-approve sang mga indi qualified nga SAP beneficiaries apang una nga ginpahayag sini nga miyembro sang Department of Social Welfare and Development (DSWD) ang nag-apruba bangud una na nga ginpadangat ang reklamo sa Bombo Radyo Bacolod.
Suno pa diri, ang mga ginhatagan sang SAP cash grant amo ang pila ka bilog sa isa ka balay kag may yara naman sang mga Job Order ukon JO sang ciudad, may yara man sang miyembro sang 4Ps ang iloy kag ang bata nga single ang ginhatagan man sang cash grant kag may yara man sang mga cash grant.
Nagapangabay man ini sa Punong Barangay nga ipaluntad ang kamatuoran kag hatagan sang hustisya ang angot sa wala nagakaigo nga pagpanagtag sang SAP.
Ang mga tagreklamo ang ginkilala kanday Loreto Tipanad, Renato Sindico, Angelita Divinagracia mga lunsay Senior Citizen; Aracelli Ortiz, wala obra; Irish Cristy Demandar kag Rosalie Jorbina, Single Parent; Wellen Marie, asawa sang security guardf, Leony Limson,senior citizen, valentino ebon kag rondy rocero, barangay kagawad.
