Ginhatagan sang 90 ka adlaw ang punong barangay kag treasurer sang Barangay Libacao, Himamaylan City agud nga makasumiter sang nagakaigo nga dokyumento sa disbursement sang P8.12 million nga pondo sang barangay sang tinalikdan nga tuig.
Santo sa report sang Commission on Audit, may mga pondo nga ginrelease sang barangay nga wala sang nagakaigo nga dokyumento kaangay sang disbursing voucher.
Nahibaluan nga ang pondo sang barangay ang ginadeposito sa bangko kag nagaissue sang cheke kun ini ang igarelease, apang sila ang required nga magsumiter sang report sa COA kada tuig.
Sa COA order, ginmanduan sanday Punong Barangay Antonio Limsiaco kag Barangay Treasurer Rey Taladua nga magsumiter sang sabat bangud may pila ka mga transaction halin sang Enero tubtub Disyembre tuig 2022 nga indi suportado sang disbursing documents.
Sa notice of suspension nga napetsahan Pebrero 15, 2023 kag nakaaddress man sa City Accountant sang Himamaylan nga si Nolan Fortunado kag Barangay Treasurer Rey Taladua, nakabutang nga ang disbursing voucher sang Marso tuig 2022 ang wala nasumiter sa COA.
Ang kabug-usan nga pondo ang nagadangat sa P8.12 million.
Sila ang ginhatagan sang 90 ka adlaw agud nga makasumiter sang nagakaigo nga dokyumento agud nga indi sila madagdagan sang Notice of Disallowance.
Gintinguhaan sang Bombo Radyo nga makuha ang sabat nanday Limsiaco apang wala ini nagasabat.
