Ginproklamar kaina sang aga bilang bag-o nga Punong Barangay sang Barangay Bata ciudad sang Bacolod si Remus Abaring kun sa diin ginbuslan sini sa posisyon ang iya pakaisa nga si anay Punong Barangay Lito Abaring.
Sa interview sang Bombo Radyo kay Punong Barangay Remus Abaring, ang iya kadalag-an ang resulta sang iya pagpangabudlay kag bulig gikan sa mga pumuluyo sang barangay.
Suno diri, napaathag sini sa iya mga pumuluyo ang mahimo sini nga serbisyo para sa barangay.
Dugang pa niya, madamo ini sang plano para sa barangay kun sa diin iya tinguhaan nga matuman ang iya promisa nga ginbuy-an humalin sa entablado kag mabuligan ang mga mga pumuluyo sang Barangay Bata tubtob sa iya masarangan.
Pahayag ni Remus, sa bahin nila sang iya pakaisa nga si Lito, iya na naathag diri nga kun maayo lang ang pamalakad sini, iya man ini paga-updan apang bangod nakita ni Remus nga naghina na ang serbisyo ni Lito, nagpaghibalo man ini mismo nga magapadalagan ini bilang punong barangay.
Apang, nangin emosyonal si Remus sa pagpahayag sini nga pulitika lang man sa gihapon ang tanan kag sila magpakaisa man sa gihapon sa dugo kag dugo.
Si Remus nagdaog sa 5698 votes samtang ang mga kagawad naman amo sanday Zyrus Batiktik, Leo Hilaro Batog, Flora Abaring, Randy Lumangyaw, Mary Ann Drigas, Ebner Abaring kag Vilma Discutido.
