Magaresign si Punong Barangay Noli Villarosa bilang barangay chairman sang Tangub, ciudad sang Bacolod kun mapamatud-an nga involved ini sa illegal gambling gani ginhangkat sini ang mga otoridad nga mag-imbestigar sang maayo.
Sa interview sang Bombo Radyo kay Villarosa, iya ginpahayag nga lunsay mga alegasyon lang ang ginabato sa iya nga involved ini sa illegal nga pasugal.
Suno kay Villarosa, wala ini nagapasilabot sa illegal gambling bangud wala ini sang kwarta para diri.
Sa pagkamatuod suno sa iya, wala ini sang kaugalingon nga balay kag siya ang nagaarkila lamang.
Panindugan sini, madamo na nga kaso ang ginpasaka sa iya halin sadto gani ginalauman naman nga may kaso naman nga ibato sa iya subong nga nagahilapit ang barangay elections ilabi na nga magapadalagan ini liwat bilang punong barangay.
Gin-imbitar sini ang otoridad nga siya ang imbestigaran – lantawon ang iya propiedad kag bank accounts agud mahibaluan kun may yara ini sang kwarta.
Suno sa punong barangay, siya mismo ang nagaduso halin pa sadto nga dulaon ang numbers game bangud wala man sang income diri ang barangay.
Magaresign man ini bilang punong barangay kun mapamatud-an nga siya ang engaged sa illegal gambling.
Suno kay Villarosa, madamo sang dalagko nga tawo nga involved man sa illegal gambling nga wala man ginaimbestigaran sang law enforcement agencies.
Ginhangkat sini ang mga National Bureau of Investigation kag Philippine National Police nga siya ang imbestigaran sang maayo bangud wala ini naganegosyo sang illegal gambling.// Suno sa iya, sabton niya ang mga akusasyon batok sa iya.
