Ginkompirmar sang punong barangay sang Barangay Tangub, Bacolod City nga magapanaug na ini sa pwesto matapos nga maathagan sa gindagdag sang Department of the Interior and Local Government (DILG) nga preventive suspension bangud sa kaso administratibo nga iya ginaatubang.
Madumduman nga ginserbe ni DILG Bacolod City Director Ma. Joy Maredith Madayag ang 3-month preventive suspension order nga ginpapanaog sang Office of the Ombudsman batok sa punong barangay sang Martes, Hunyo 1.
Ginpasakaan ni Barangay Kagawad Dindo Amadeo sang kaso si Villarosa matapos nga ini ang ginsumbag sang punong barangay sang Hunyo 19, 2019.
Sa interview sang Bombo Radyo Bacolod kay Barangay Tangub Punong Barangay Noli Villarosa, tumanon na sini ang ginpapanaug nga suspension order sang DILG matapos nga ginmando sang Ombudsman.
Ang suspension order ang ginpirmahan ni Paul Elmer Clemente, Deputy Ombudsman for the Visayas sadtong Agosto 12, 2020.
Ginserbe naman ini kay Villarosa suspension sang DILG-Bacolod sadtong Hunyo 1, 2021 kag nakasaad diri ang mga nagakaigo nga ebidensya para sa simple misconduct batok kay Villarosa.
Aminado man si Villarosa nga medyo nagpanginit ini bangud indi kahangop sang gindagdag sa iya nga suspension order apang nagapasalamat siya sa mga abogado niya nga nagpaathag kag naggiya tubtob nga maathagan.
Ginpamangkot man sini ngaa nakalab-ot sa Ombudsman ang iya kaso nga wala na ini dapat ginahatagan sang atensyon sang ahensya.
Wala naman si Villarosa nagapanumdom kun san-o magbalik sa opisina sini kag nagapati siya nga madismiss man ang iya kaso.
Natalana naman nga iturn over sini ang talatapan kay Barangay Kagawad Luz Atienza.
Nagpanugyan man ini sa mga residente nga magkalma kag kilalahon ang Ginoong Diyos kag ipakita nga propesyunal kag mabuot nga mga pumuluyo sang barangay Tangub.
