Naabswelto ang punong barangay sang Barangay Tangub, Bacolod City sa ginpasaka nga kaso batok sa iya sa Office of the Ombudsman.
Sa interview sang Bombo Radyo Bacolod kay Punong Barangay Noli Villarosa, nagapasalamat ini sa Ombudsman matapos nga ginbaton sang ahensya ang ginfile sini nga motion for reconsideration.
Suno kay Villarosa, wala man ini nagtanum sang kalain sang buot kag wala man ini sang plano nga personalon ang nagpasaka sang kaso batok sa iya bangud ang luyag lamang sini ang maghatag sang serbisyo sa mga pumuluyo.
Suno diri, ginpasurvey ang duta nga ginreklamo sang complainant kun sa diin napamatud-an nga roadmap.
Ginpahayag man sang punong barangay nga dako man ang pagpasalamat sini nga ginid-idan sang Office of Ombudsman ang pag-imbestigar sa kaso nga ginpasaka sa iya.
Suno kay Villarosa ang tanan nga ginahimo sini sa barangay ang para maghatag sang serbisyo sa mga pumuluyo kag kun may yara sang ginpaguba nga obstruction sa barangay may yara ini sang ginpagwa nga notice.
Ginpahayag man sini nga bisan gina-atake na siya personal, wala ini sang plano nga magbalos.
Samtang ginkumpirmar ni Atty. Caesar Distrito, lead ounsel ni Punong Barangay Noli Villarosa kag Baranay Kagawad Jose Ray Pendon sang Brgy Tangub, nga nabaton na sang mga ini ang opisyal nga kopya sang desisyon sang Office of the Ombudsman nga may petsa Jan. 9, 2023.
