Makaligad ang anom ka bulan nga preventive suspension, magabalik na sa iya opisina ang punong barangay sang Barangay Tangub, Bacolod City buas, Marso 17.
Si Villarosa ang ginsuspend kasunod sang kaso nga ginpasaka batok sa iya kaangot sa donation box sang barangay sang nagapanagtag sang social amelioration program cash grant.
Sa interview sang Bombo Radyo Bacolod kay Punong Barangay Noli Villarosa, ginpahayag sini nga wala man siya na-excite nga makabalik sa pagtrabaho bangud dako nga risgo kag responsibilidad naman ang iya paga-atubangon.
Suno kay Villarosa, makig-angot pa siya sa Department of the Interior and Local Government (DILG) kun mahimo pa siya magkuha sang iya sweldo kag mga benefits matapos nga masuspend ini.
Ginbasura naman sang Ombudsman ang kaso sa iya bangud sa donation box nga gin-angot sa SAP bangud wala man sang probable cause.
Mabudlay man suno sa iya nga pamatud-an ang reklamo sang mga barangay kagawad bangud sa ghost employees.
Suno kay Villarosa, bilog lang nga kantidad ang ginabutang sa tion nga magbudget kag wala sang nabutang nga mga tawo.
Ang paghire sang mga job orders suno diri ang kabahin sang administrative function sang barangay chairman.
Ginpahayag man sini nga kun sin-o man ang may reklamo, dapat nga magpasaka sang kaso sa korte agud makafile man ini sang moral damages kun indi mapamatud-an nga guilty ini.
Nagpanugyan man ini sa mga pumuluyo nga suportahan ang punong barangay kag barangay kagawad bangud sila man ang nagpili agud nga makapungko ang mga ini.
