Nalakip si Punong Barangay Noli Villarosa sang Barangay Tangub, ciudad sang Bacolod sa tatlo ka mga punong barangay nga ginkasuhan sang violation sang Anti-Illegal Gambling Law bangud sa ginaalegar operasyon sang Small Town Lottery sa ciudad sang Kabankalan.
Ang nasambit nga kaso ang ginpasaka sang National Bureau of Investigation Bacolod District Office sa Kabankalan City Prosecution Office kaina sang aga.
Suno kay NBI Bacolod Head Atty. Renoir Baldovino, si Villarosa ang financier sang illegal nga operasyon sang Small Town Lottery sa ciudad sang Kabankalan.
Kaupod sini nga ginkasuhan sanday Punong Barangay Franz Leonard Seguiro sang Barangay 6, Kabankalan City; kag Punong Barangay Joel Alibango sang Barangay 5 sa nasambit nga ciudad.
Isa man ka Jane Doe nga ginhingadlan lamang kay Maam ang ginkasuhan man kag siya ang ginatudlo nga manager sang STL operation sa southern city.
Sang Pebrero 15, isa ka entrapment operation angot sa illegal gambling ang ginpatigayon sa Kabankalan City kasunod sang reklamo sang Super Lucky Beagler Incorporated kun sa diin tatlo ka nagapataya kag isa ka nagataya.
Diri na naggwa ang ngalan nanday Seguiro kag Alibango nga nagpahanugot sa ila nga magpataya sang illegal numbers game sa duha ka barangay gani sila ang ginsummon sa NBI kag nakahatag naman sang statement duha na ka semana ang nakaligad.
Naggwa sa imbestigasyon nga sang Pebrero 8, ginsapol ang nagapataya sa gym sa Kabankalan kag sang Enero, si Villarosa ang nagtipon sa mga punong barangay sa nasambit nga ciudad angot sa illegal numbers game operation.
Ila man gintudlo si Villarosa bilang financier sang illegal gambling samtang si Maam naman ang ginatudlo nga manager.
Suno sa mga nagapataya, sila ang nagpasugot sa operasyon bangud sila ang magabaton sang 15 porsyento sang ila nga income bilang komisyon.
Suno kay Baldovino, ang resulta sang STL sa illegal nga nagapataya ang ila ginakuha sa Super Lucky Beagler Incorporated.
