Ginpahayag sang legal counsel ni Punong Barangay Noli Villarosa sang Barangay Tangub, ciudad sang Bacolod nga sila ang maga-file sang motion for reconsideration kun mag-abot ang opisyal nga resolusyon nagikan sa Office of the Ombudsman Visayas angot sa kaso nga ginfile batok sa punong barangay.
Suno kay Atty. Dindo Ramos, ila na nabaton ang notice nga ginserbe sang Department of the Interior and Local Government (DILG) nga pagsuspend kay Villarosa sa anom ka bulan.
Apang wala pa sang may nag-abot nga opisyal nga resolusyon nagikan sa Ombudsman.
Sa tion nga mag-abot na ini suno kay Ramos, plano sang kampo ni Villarosa nga magfile sang motion for reconsideration.
Ginpahayag naman sang punong barangay nga magapadayon ang naumpisahan na sini nga mga proyekto para sa barangay.
Samtang, humalin Mayo 7 tubtob Nobyembre 7, magapungko bilang Officer-in-Charge si Kagawad Luz Atienza nga amo ang Number 1 kagawad sang barangay.
