Magabalik na sa opisina si Punong Barangay Noli Villarosa sang Barangay Tangub subong nga adlaw, matapos ang anom ka bulan nga suspension.
Sa interview sang Bombo Radyo Bacolod kay Villarosa, nabatun sini sang Huwebes ang order gikan sa Department of the Interior and Local Government (DILG) nga siya ang dapat magbalik na sa pwesto epektibo Nobyembre 9.
Madumduman nga siya ang nakabatun sang 6-month suspension without pay bangod sa complaint sang pila ka Barangay officials sang 2022 angot sa delayed nga sweldo kag illegal nga pagpa-utang sang iya asawa.
Nabatun sang abogado ni Villarosa ang suspension order sang Mayo 8 kag naglapse na ang anom ka bulan nga suspension kahapon.
Nahibaluan nga wala naman nagdayun ang mga opisyal sang Barangay sa complaint kag maayo naman sa karun ang ila pagtamdanay, apang ang kaso ang ginpadayun sang Ombudsman.
Suno kay Villarosa, ginabatun sini ang disciplinary action bangod sa negligence of duty kun sa diin wala sini nahibaluan nga may nagakatabo na nga irigularidad.
Pahayag sini nga ginahagad ini sang iya mga utod nga magbakasyon sa luwas sang pungsod apang ginpili sini nga magtinir sa Barangay.
Panindugan ni Villarosa nga wala suspension sa pagserbisyo, gani luyag sini nga mabatyagan sang mga pumuluyo nga sila ang may masandigan kag madalaganan bisan nga siya ang wala sa pwesto.
