Nagpanindugan si Punong Barangay Noli Villarosa sang Barangay Tangub, Bacolod City nga indi ini magpanaog sa pwesto apisar sang ginpapanaog nga suspension order kun indi magpaathag ang Department of the Interior and Local Government (DILG) sa atubang sang iya abogado.
Madumduman nga ginserbe ni DILG Bacolod City Director Ma. Joy Maredith Madayag ang 3-months preventive suspension order nga ginpapanaog sang Office of the Ombudsman batok sa Punong Barangay sang Martes, Hunyo 1.
Depensa ni Villarosa, nga limitado lang ang ihibalo sini sa layi, gani kinahanglan nga magpaathag ang DILG sa iya samtang upod ang iya abogado.
Pahayag sini nga masakit nga mahatagan sang supensyon nga indi man mahangpan.
Gindumdum pa sang Punong Barangay nga nasuspende na ini sang anum ka bulan sang damlag lang, apang wala pa tatlo ka bulan nadismiss man ini.// Ginapinsar ni Villarosa nga madulaan lang sang pulos ang sakripisyo sini nga pagkasuspende sang tatlo ka bulan kun makaangay lang man nga madismiss ang kaso ilabi na nga wala pa makahearing.
Suno pa diri, kun mapamatud-an gid man ang sala sini, willing man siya nga magpanaog sa pwesto.
Aminado naman ini nga dismayado siya sa DILG.
Gindumdum ni Villarosa nga sang nakaligad, nagpangayo man ini sang assistance sa DILG maykaangatanan sa clearing operations sang mga illegal structures, illegal settlers, illegal vendors kag mga pagbaha apang wala gid magpalapit ang DILG.
Paathag sini nga dapat makitaan sang good governance ang DILG, nga nagaserbe kuntani nga mediator sa tunga sang pumuluyo kag barangay officials.
Apang wala naman nagapakigkita sa iya ang DILG kag nagpakita lang agud iduso sa iya sang suspension order nga daw kaangay nga ini pa ang nagarekomendar sang suspensyon.
Dugang pa sini nga nadula na ang pagsalig sini sa DILG gani indi sya komportanbe nga maga-atubang sa ahensya.
