Napilian bilang bag-o nga president sang Liga ng mga Barangay sa Negros Occidental ang Punong Barangay sang Barangay 2, Victorias City sa ginpatigayon nga piniliay sa Seda Hotel kahapon sang aga, Disyembre 12.
Si Liga ng mga Barangay President Richard Julius Sablan ang unopposed ukon wala sang kontra.
Siya ang magabulos kay Board Member Juvy Pepello nga nagikan man sa Victorias City.
Matapos magpanumpa sa posisyon, si Sablan ang magapungko nga ex-officio member sang Sangguniang Panlalawigan sang Negros Occidental.
Samtang napilian bilang Bise Presidente si Annabelle Bermudo sang La Carlota kag ang Auditor amo si Jerome Agustin sang Cauayan.
Sa interview sang Bombo Radyo Bacolod kay Richard Julius Sablan, sa iya nga pagpungko bilang president sang Provincial Liga ng mga Barangay padayunon sini ang mga ginapatigayon nga program sang outgoing Provincial Liga ng mga Barangay president nga mangin drug free ang mga kabarangayan sa Negros Occidental kag diutay nalang ang mga barangay nga wala nadeklarar nga drug free.
Samtang, magapatigayon man ini sang seminars sa tanan nga elected kag incumbent barangay officials sa bug-os nga probinsya kaupod ang Department of the Interior and Local Government (DILG).
Kasubong magapatigayon man ini sang seminar sa mga Barangay Tanod kag mga Lupon agud nga mahatagan sang update sa proseso sang barangay.
