Ginkumpirma sang Punong Barangay sang Barangay 24, ciudad sang Bacolod, nga bata sini ang ginakabig nga High Value Individual nga naaresto sa drug buy bust operation nga ginpatigayon sa Purok Hollow Blocks, Bangga Yap, Barangay Singcang-Airport, Bacolod City, sang Huwebes.
Arestado ang duha ka suspek nga sanday Charisse Nicole Ledesma, 38 anyos kag Remus Cabiles, 45 anyos residente sang Brgy. Taculing.
Nakuha sa mga suspek ang 6 ka sachet sang suspected shabu, ginabulubanta nagabug-at sang 60 grams kag nagabalor sang kapin P408,000.
Ang suspetsado nga si Charisse Nicole Ledesma, amo ang bata ni Punong Barangay Lope Ledesma sang Barangay 24.
Sa interview sang Bombo Radyo kay Punong Barangay Lope Ledesma, humalin pa lamang sang naga-eskwela sa kolehiyo ang bata sini nga si Charisse, nakita na sini ang indi manami nga batasan sang iya bata.
Suno diri, nagtinir sang 10 ka tuig si Charisse sa kolehiyo kag sang ini naggradwar, nahimo pa sini nga magtrabaho sa luwas sang pungsod.
Nagkapamilya si Charisse apang sa karun bulagay na sila sang iya bana.
Suno sa Punong Barangay, madugay na nga wala nagatinir sa puder sini ang iya bata nga sa karun wala sang permanente nga address.
Nakaagi man preso si Charisse kag sang nakaggwa, liwat ini nga nagbalik sa bisyo.
