Nagrisgo ang Punong Barangay sang Barangay Canlusong, banwa sang EB Magalona, nga magpadulong sa Sitio Nabalas kun sa diin nagluntad ang duha ka serye sang engkwentro sa tunga sang 79th Infantry Battalion sang Philippine Army batok sa gina-alegar New People’s Army sang Martes sang hapon.
Sa interview sang Bombo Radyo kay Punong Barangay Miriam Porras, kahapon nabatian sini ang pagbarak sang lupok apang wala ini nag-ekspektar nga lupok sadto sang armas-luthang.
Suno diri, nagpadulong ang isa ka kagawad sa iya kag didto na sini nahibaluan ang natabo nga engkwentro.
Alas 5:30 sang hapon kaupod ang iban nga kagawad naglakat si Porras padulong sa Sitio Nabalas, apang bangod sa kalayuon, gab-i na kag madulom na ang palibot sang sila nakaabot sa area.
Sang malapit na sila, sa una nga balay may yara sang isa ka indibidwal nga nakastand-by kag suno kay Porras indi sini matumod kun militar ukon NPA ang tawo.
Nagpakilala si Porras nga sila mga opisyal sang Barangay kag luyag man nila nga padulongan ang mga pamilya sa area kag kamustahon ang ila sitwasyon.
Ini matapos nga may nakuha sila nga impormasyon nga may yara didto sang pamilya nga may duha ka magagmay nga kabataan.
Sila ginpahanugotan sang tawo nga nakastand-by nga magpadayon sa ila lakat apang ituon lang nila ang ila flashight sa dalan.
Nagpadayon sa panglakaton sanday Porras apang sang malapit na sila sa mga panimalay, sila nakabati sang singgit naggikan sa babaw nga “Balik, Balik, kay wala pa natapos”.
Nagbalik sanday Porras kag ila liwat nga nalabyan ang tawo nga nakastand-by sa una nga balay kag sila ginhambalan nga magrekta lang sila lakat balik sa ila nga gin-agyan.
