Ginpanindugan sang Punong Barangay sa Barangay Tangub, Bacolod City nga ginahatag sini sa pumuluyo ang diber kun magapirma sa people’s initiative campaign para sa Charter Change, kag wala man sang imbulbado nga kwarta.
Sa interview sang Bombo Radyo Bacolod kay Punong Barangay Noli Villarosa, nagikan ang mga pormas mismo sa House of Representative.
Panindugan sini nga agud mapamatud-an nga inisyatibo sang mga pumuluyo ang pagpirma, ginpanugyanan pa sini nga kuhaan sang litrato kag ipost sa social media.
Dugang pa sini nga wala man sang pilitay kun luyag nga magpirma ukon indi, kag pasalig sini nga wala sang bisan isa sa iya pumuluyo nga magareklamo nga sila ang iya ginpilit ukon gin-engganyo nga magpirma.
Nagapati si Villarosa nga sa karun nga henerasyon, mahapos na lamang mahibaluan sang mga pumuluyo ang kaundan sang Article 17 Section 1 nga nakapagkit sa papel nga ginapalibot para sa people’s initiative pinaagi sa social media.
Panindugan sang Punong Barangay nga sila ang wala sang ginatago sa pumuluyo.
Dugang pa sini nga matapos makuha ang kinahanglan nga porsyento, magalabay pa sa plebisito ang ginaduso nga ammendments sa provisions sang konstitusyon nga magakinahanglan man sang liwat nga pagboto sang mga pumuluyo.
Ginalantaw sini nga sa Hunyo ukon Hulyo pa mahimo mapatigayon ang plebisito kag dako pa ang oras agud mapahangop ang mga pumuluyo sa benepisyo sang ammendment sa konstitusyon.
Paathag ni Villarosa nga ang people’s initiative ang pinakamahapos nga nakita nga pamaagi agud maduso ang pagligwat sa konstitusyon bangod mabudlay ini nga mapasar sa Senador kag magastos man kun magpatigayon pa sang Constitutional Convention.
Pabor man si Villarosa nga dulaon na lamang ang Senado bangod para sa iya, ang 1987 Constitution ang wala man sang nabulig sa tawo.
Panindugan sini nga tuman ka damo sang mga hagna nga napending lamang sa Senado, kag ang mga Senador ang wala man sang binuligan sa mga probinsya indi kaangay sang mga Kongresista nga nakahibalo sang sitwasyon sa ila tagsa ka distrito.
Dugang pa sini nga pinaagi sa ammendment sa konstitusyon, maplastar man kun pila gid ang term of office sang mga Punong Barangay nga masami ginapalawig sa kun san-o maluyagan sang mga Senador.
