Ginpasiguro sang punong barangay sang Barangay 12, Bacolod City nga nakahanda na ang mga ini nga magrelocate bangud sa development sang Manokan Country.
Sa interview sang Bombo Radyo Bacolod kay Punong Barangay Ely Alcantara, nakahanda na ang mga residente nga apektado sang demolition apisar nga may naga-ayo lang nga mahatagan pa sang dugang nga tinion.
Suno kay Alcantara, magatambong sa pre-demolition conference sa Enero 13 ang mga apektado nga residente.
Ginpahayag man sini nga ang mga apektado nga residente ang nagaayo lamang sang dugang nga tinion para makasaylo ang mga ini sa relocation site.
Nahatagan naman sang ayuda ang mga apektado kun sa diin P20,000 ang personal nga bulig sang alkalde kag P10,000 nagikan sa city government.
Ginpahayag man sini nga may 22 pa ka mga apektado ang wala pa nakasaylo kun sa diin ang 20 ang nahatagan sang masayluhan sa relocation site kag ang duha ang ginapangitaan pa sang mas malapit nga relocation site bangud lunsay may mga may edad na.
Nagpanugyan naman si Alcantara sa mga pumuluyo nga nahatag naman sang ciudad ang ila nga mga kinakahanglan gani dapat nga boluntaryo na nga maghalin sa lugar kag magsaylo na sa ila nga sayluhan.
