Duha ka kaso ang pangatubangon sang Punong Barangay sang Barangay 12, Victorias City matapos nga ini ang makuhaan sang indi lisyensyado nga armas, mga bala kag isa ka granada sang ginserbehan sang search warrant sa Hacienda Nasiponan, Brgy. 12, Victorias City sang Hulyo 17 sang aga.
Ginkilala ang nadakpan nga si Punong Barangay Garry Bacay, 54-anyos, kasado, lalaki, kag residente sang nasambit nga lugar.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office, ang pagserbe sang search warrant ang ginpatigayon sang Victorias City Police Station, Negros Occidental Police Provincial Office upod ang CIDG Negros Occidental Provincial Field Unit kag Regional Mobile Force Battalion (RMFB).
Narecover sa iya ang isa ka caliber.22 revolver wala sang serial number nga loaded sang six (6) rounds sang caliber .22 ammunition, sixty-three (63) rounds sang caliber .22 ammunition, kag isa ka hand grenade.
Wala pa mahibaluan kun ano na ini kadugay nga nagaserbisyo bilang Punong Barangay.
Suno kay Apang may yara sang pila ka mga pumuluyo nga nagreklamo batok kay Bacay nga nagresulta sa pagserbe sang search warrant batok diri.
Si Bacay ang pasakaan sang kaso nga paglapas sang RA 10591 ukon “Comprehensive Firearms and Ammunition Regulation Act,” kag Republic Act No. 9516 ukon illegal possesion of explosives.
