Tuman ang kalipay sang pumuluyo sang Barangay 29, Bacolod City sa pagdaog bilang grand champion sa Electric MassKara float sang Sabado.
Sa interview sang Bombo Radyo kay Punong Barangay Leonard Pascua, wala nangin mahapos ang pagtrabaho nila sang float bangod sa Bagyo Kristine kag kadakuon sang platform.
Suno diri, madugay na sini nga ginpaminsaran ang disenyo kag siya mismo nakahibalo sang proseso sang paghuman sang float.
Nagfocus ang ila Barangay sa blue sapphire nga duag bangod nga manami ini lantawon bisan sa dulom kag ini ang mabugnaw kun tan-awon.
Dako ang pagpasalamat sini sa tanan nga nagbulig kag nagtrabaho sa float nga nag-angkon sang dako nga pagdaog.
Dugang pa ni Pascua, wala gintipid ang paghuman sang float agud man mapakita sa mga sponsors nga naggamit sang husto ang budget.
Nakabaton ang Barangay 29 sang P300,000 cash prize, samtang ang Barangay Pahanocoy naman ang nagbaton sang P200,000 bilang first runner up kag Barangay 17 nga may P150,000 cash prize bilang second runner up.
Samtang, nagdaog naman bilang grand champion sa Elektrika Diva ang Brgy 39.
Nakabaton sang P75,000 cash prize si Elektrika Diva Nikka Marie Peñol sang Barangay 39.
Nangin first runner up naman si Ashley Nicole Belnas sang Barangay 29 nga nagbaton sang P30,000 kag second runner up si Althea Judema sang Barangay Pahanocoy nga nagbaton sang P25,000 cash prize.
