Laka-laka nga paglupok sang armas-luthang lamang ang nabatian sang Punong Barangay sang Barangay Abaca, Cuayan, Negros Occidental sang nagluntad ang engkwentro sa tunga sang South-West Front sang New People’s Army kag katapo sang15th Infantry Battalion sang Philippine Army kahapon, Mayo 16.
Sa interview sang Bombo Radyo Bacolod kay Punong Barangay Leonido Carbahosa Cumawas, sang nagluntad ang engkwentro nagakay-o ini sang iya salakyan sang nabatian ang paglinupok pasado alas 6:00 ang takna sang aga.
Gindumdom niya una nga halin sa nasunog nga bagay ang ginhalinan sang lupok.
Suno kay Cumawas, ang ginhalinan sang lupok ang may kalayuon nga 500-600 meters gikan sa ila puluy-an.
Nagdugay ang paglinupok sang 15 tubtob 20 mins.
Ang balay sini ang nahamtang sa ubos sang isa ka coffee shop.
Ginkumpirmar man sini nga may yara sang nag-evacuate nagikan sa ila nga lugar nga ginabug-usan sang apat ka pamilya ukon 11 ka indibidwal kun sa diin ang mga ini ang gindala sa health center sang nasambit nga pamalay kag nadul-ungan naman sang foodpacks.
Dugang pa sang punong barangay nga ang iban nga mga evacuees ang nagpadulong sa ila mga pamilya sa Ulihao.
Samtang alas 5:00 sang hapon nagpadayon ang engkwentro apang indi na sini mabatian ang paglinupok apang nagapadayon lamang ini sa pagmonitor sa mga facebook post agud nga updated sa nagakatabo.
Aga pa siya ginpatawag kahapon sang mga kapulisan sang Cauayan Municipal Police Station agud nga ipatumod kun ano ang lugar bangud madamo sang report nga sa Abaca ang lugar kun sa diin napatay ang lima.
Gani ginkumpirmar sini nga ang nahamtangan sang bangkay ang indi kabahin sang Abaca.
Dugang pa sini nga una ini nga bes nga natabo sa Barangay Abaca kag Poblacion kag mahimo nga ang ila lugar ang ginpalagyuhan lamang sang mga rebelde.
Samtang nagpanawagan ini sa mga pumuluyo nga kooperahan ang development nga ginahimo sang mga Barangay Officials agud nga makahatag sang nagakaigo nga basic services.
Ginpahayag naman sang Punong Barangay sang Barangay Poblacion, Cauayan, nga may mga nabatian ang mga residente nga linupok santo man sa impormasyon sang Barangay Tanod.
Sa interview kay Punong Barangay Sergio Esmores Jr. ginbalewala niya lamang ang nabatian nga paglinupok bangud may yara man sang presensya ang Philippine Army sa lugar.
Suno kay Esmores, apang bangud sa paglinupok may mga residente nga nagapuyo sa kilid sang bukid ang nagpangayo sang rescue agud ng masiguro ang ila nga safety.
Suno sa punong Barangay ginkuha sang Barangay ang mga ini kag gindala sa eskwelahan nga ila evacuation center.
Nagdangat sa 23 ang pamilya nga gin-evacuate kun sa diin gindala sa central school sa ila lugar.
Madugay man ang nabatian nga paglinupok bangud nag-umpisa alas 6:00 sang aga kag natapos sang alas 5:00 sang hapon.
Suno diri, ginpahayag sang mga suldado nga ang engkwentro ang naghalin sa Sitio Turil, Barangay Man-uling tubtob nga nagdangat sa Barangay Poblacion.
Nag-upod man ini sa pag-retrieve sang bangkay sang mga napatay sa engkwentro kun sa diin sa kilid sang bukid nakita ang lima.
Dugang pa sini 1980s natabo na ang kaangay nga engkwentro kag subong lang nasulit.
Nagpanugyan man ini sa mga pumuluyo nga magkalma na bangud ang mga bangkay ang naretrieve na sang mga otoridad kag nadala na sa morgue
