Aminado ang Punong Barangay sang Brgy Bata, Bacolod City nga makabulig ang paghamtang sang Barangay Tanod sa sulod sang mga eskwelahan, apang nagapati ini nga mas epektibo kun mga pulis ang magabantay sa seguridad sang kabataan.
Sa interview sang Bombo Radyo Bacolod kay Punong Barangay Remus Abaring, may tatlo ka eskwelahan sa ila Barangay nga ginalakipan sang isa ka High School kag duha ka Elementary School.
Samtang may 27 naman ka Brgy Tanod.
Antes paman ang pagduso ni Department of the Interior and Local Government (DILG) Secretary Jonvic Remulla kag sang Department of Education sa paghamtang sang tanod outpost sa sulod sang school campus, ang Barangay ang nagapadala na sang tigduha ka Brgy Tanod sa mga eskwelahan.
Apang ang mga tanod ang yara lamang sa gwa nagabantay, kag nagabulig man sa pagderiher sang trapiko partikular na sa pagbukas sang eskwelahan kun aga.
Apang luwas sa mga eskwelahan, ang mga tanod ang nagabantay man sa mga vital areas kaangay sang merkado, kag may na-assign man sa Barangay Hall para sa pagbantay sang seguridad.
Para kay Abaring, mas epektibo kuntani kun mga kapulisan mismo ang pahanugutan nga magbantay sa sulod sang school campus.
Paathag sini nga kun kis-a may mga kabataan nga wala nagataha kag nagabato pa sa mga Barangay Tanod.
Samtang kun pulis ang magabantay, makita palang sang mga kabataan ang ila nga uniporme, matahap na ang mga ini maghimo sang ginamo.
Ginarekomendar man sini ang pagdeploy sang Job Order gikan sa ciudad.
Sa pihak nga bahin, kun ang Barangay Tanod ang segurado nga magabantay, pangabay sini nga kuntani sila ang mabuligan man sang City Government sa paghatag sang allowance.
