Nagapati ang Punong Barangay sang Barangay E. Lopez, Silay City nga ginabanta yara sa 40 tubtob 50 anyos ang mga suspek nga naglampos sang bato sa Bornales siblings.
Sa interview sang Bombo Radyo kay Punong Barangay Joel Valdez Arce, nagapati ini nga yara lamang sa lugar ang mga suspek samtang padayon ang pagtipon sang ebidensya agud makumpirmar kun sin-o gid man ang mga suspetsado.
Suno diri, wala sa husto nga paminsaron ang naghimo sang krimen sa pagpanakit sa mga kabataan.
Madumduman nga antes nagpauli ang iloy sang mga biktima gikan sa luwas sang pungsod nagpost ini sa iya social media account nga may ginatumod siya nga tawo nga may yara na sang pamilya kag kabataan nga naghimo sang krimen, amo nga nagapati ang iloy nga indi barkada sang iya bata ang suspek.
Suno kay Arce, ang nagapanguna gid nga makatudlo kun sin-o ang suspek amo ang 15 anyos nga biktima apang padayon pa ini nga nagarekober sa ospital matapos nga gin-operahan sa ulo.
