Gin-athag sang Punong barangay sang barangay Felisa, Bacolod City nga wala sila nagapamatok sa Waste to Energy (WtE) project nga itukod apang nagapanawagan lamang sila nga may yara sang public consultation nga himuon.
Sa interview sang Bombo Radyo kay Punong barangay Francisco Hilado, nakahibalo sila nga may yara sang itukod nga Waste to Energy project ang Forza Development Corporation sa barangay apang luyag lamang sang pumuluyo nga mahibaloan kun ano ang matabo kun matukod na ang proyekto.
Suno diri, mas maayo nga mismo ang LGU ukon ang korporasyon ang makasabat sa concerns sang pumuluyo amo nga nagapanawagan sila nga may yara sang public consultation.
Suno kay Hilado, kinahanglan nga mapa-athag sa pumuluyo kun ano ang masunod nga tikang matapos nga marentahan ang duta tubtob nga matukod na ang pasilidad.
Kahapon, naratify na ang contract for lease sa tunga sang Bacolod City government kag Forza Development Corporation.
Sa idalom sang kontrata ang ciudad magaparenta sang 10 ka ektraya sang duta malapit sa Sanitary Landfill.
Ang kontrata valid sa sulod sang 25 ka tuig kag ang renta nagabalor sang P1 million kada tuig apang mahimo pa ini magbag-o.
