Ginklaro sang Punong Barangay sa Brgy Libas, Isabela nga para sa online content lamang ang naglapta nga video nga kaangay nga ini ang nagaliligid sa kalipay matapos mapasar ang layi para sa pagpalawig sang termino sang Barangay and Sangguniang Kabataan Elections sa lima ka tuig.
Sa interview sang Bombo Radyo Bacolod kay Punong Barangay Brenda Pagapang Fernandez, ginrecord ang video antes paman ang pagpirma ni President Ferdinand Marcos Jr. sa Republic Act No. 12326, ukon ang layi nga nagahatag sang 5-years term para sa mga opisyal sa Barangay, sa duha ka termino, kasubong man ang postponement sang Brgy and SK elections sa 2028.
Suno diri, nakaandan na nila nga kun yara sa opisina sang Liga ng mga Barangay kag wala man sang iban nga tawo, sila ang nagarecord sang content para sa social media.
Wala man ini sang malain nga intensyon sa ginhimo nga pagligid-ligid, kag ini ang sunluganay lamang nila.
Aminado si Fernandez nga wala na ini sang mahimo sa kun ano ang ginapinsar sang iban nga tawo, apang kampante ini nga siya ang kilala sang mga pumuluyo sa Brgy Libas.
Pahayag sini nga ang mga pumuluyo ang nakahibalo sang iya paghimakas, samtang ginasaligan naman ang serbisyo sang ila pamilya humalin pa sa ila nga lola.
Suno diri, sang 2018 iya nga utod ang Punong Barangay, apang ini ang gintiro isa ka bulan pa lamang sumugod sang nagpungko, kag bangod siya ang No. 1 Kagawad, siya ang nagtal-os sa pwesto.
Liwat ini nga nagpapili sang 2023 Elections, kag siya ang ginboto gihapon sang mga pumuluyo.
Ginapasalamat ni Fernandez nga nahatagan sang extension ang ila pagserbisyo, bangod matuman pa sini ang mga plano para sa kauswagan sang Barangay.
Suno sa iya, nakatukod na sila sang Barangay Hall, day care center, solar street lights, tubig, kag dalan.
Sa dugang nga duha ka tuig sa pagserbisyo, iduso naman sini nga mabutangan sang rescue vehicle.
Gindeny man sini ang mga comments kaangay sang ‘paldo na naman si Kap,’ sa panindugan nga gamay lamang ang Internal Revenue Allotment (IRA) sang ila Barangay.
