Nagpaandam ang Punong Barangay sang Barangay Singcang-Airport, ciudad sang Bacolod, nga bisan magamay man ukon madako nga balor sang droga, wala sang may makaluwas diri kag pagadakpon ang tanan nga imbolbado.
Ini kasunod sa masobra sa P20.5 million nga balor sang suspected shabu ang narecover sa drug buybust operation kay Jummel Camento alyas Tata, 38 anyos, single, wala sang trabaho kag residente sa nasambitan nga lugar.
Sa interview sang Bombo Radyo kay Punong Barangay Rosinie Distrito, si Camento ang under surveillance nga ini isa ka anay preso.
Suno diri, kun naglapta ang masobra tatlo ka kilo sang illegal nga druga sa ciudad, ini pa makatuga sang krimen kag dako nga kwarta ang magasto sa illegal.
Pahayag ni Distrito, gamay man ukon dako nga balor sang druga ang magsulod sa nasakupan sini nga Barangay, pasalig sini nga madakpan ang tanan nga imbolbado diri.
Dugang pa niya, makaluwas man ang mga ini sang pila ka bulan, sigurado ini nga madakpan man sila liwat sa gihapon.
Samtang, Agosto 10 sang naaresto si Michael Frias nga nagahupot sang masobra duha ka kilo nga shabu sa Barangay Vista Alegre sa balor nga P14,382,000 kag sa karun arestado naman si Camento sa 15 ka sachet sang suspected shabu nga nagabug-at 3.20 kilograms kag may standard drug price nga P20,536,000, gani may pagpati si Distrito nga ginapasa-pasa lang ang ila illegal nga trabaho.
Apang, nagpanugyan ang punong barangay nga untaton na ang pagbaligya sang druga bangod wala sang may nag manggranon sa Barangay Singcang -Airport sa pagbaligya sang illegal.
