Aminado ang punong barangay sang Barangay Taculing, syudad sang Bacolod nga wala ini una nakahibalo nga ginpatawag ang barangay kagawad bangud may igarescue nga mga kabataan nga biktima sang cyber crime sa Espinos Village 2, Purok Tumpok sang Hulyo 14 bangud gindumdom sini nga buybust operation ang ginpatigayon.
Ang mga suspek amo sanday Mary Rose Maribao Campaner, 28 anyos, wala sang trabaho; kag Romy Librando Ligidligid, 35 anyos, kag residente sang nabanggit nga lugar.
Sa interview sang Bombo Radyo Bacolod kay Punong Barangay Lady Gles Pallen, nagcoordinate ang Department of Social Services and Development (DSSD) sa Barangay bangud kinahanglan ang duha ka mga representatives gikan sa barangay agud magwitness para sa mga nakuha nga ebidensya.
Suno kay Pallen, wala na sang mga barangay kagawad naabtan ang mga minors nga ginrescue, kag ang pagtsekyar sang mga ebidensya na lamang ang nalab-utan.
Ang katapo sang DSSD, DSWD-Cebu kag mga kapulisan sang Bacolod Police Station-6 ang nagpatigayon sang entrapment operation kun sa diin natigayon nga marescue ang apat ka mga kabataan kag nakuha ang mga ebidensya kaangay sang laptop.
Suno kay Pallen, natrack ang mga ini matapos nga may nadakpan sa Cebu ang nagahimo sang pareho nga illegal nga buluhaton kag didto man nahamtang ang opisina sang organization sang mga nadakpan, gani nangin kabahin sang entrapment operation ang DSWD-Cebu.
Ginpahayag man sini nga santo ang ila nga natipon nga impormasyon, ginrescue ang mga menor de edad matapos nga ang mga ini ang imbuldado sa online exploitation kasunod sang pagkuha sa ila sang litrato nga nagapakita sang ila pribado nga bahin sang lawas.
Ginapahayag nga ang handler sang mga nadakpan ang gina-aligar Australian national.
Nakibot man ang punong barangay nga may kaangay nga aktibidad sa barangay bangud ang nahibaluan lamang sang mga ini nga sa tion sang operasyon batok sa illegal gambling kag illegal drugs nagapatawag sang barangay kagawad, wala man ang mga ini nagdahom nga may yara na sang igarescue nga mga bata bangud biktima sang cyber sex nga ang may kahimuan mismo ang mga ginikanan sang mga ini.
Gindala na ang mga kabataan sa hilway nga institution kun sa diin ginhatagan naman sang barangay sang diaper kag iban pa nga kinahanglanon.
