Natalana nga pasakaan sang kaso ang isa ka punong barangay sa banwa sang Toboso matapos mahibaluan ang anomaliya sini tuhoy sa pagpanghatag sang Social Amelioration Program cash assistance.
Sa interview sang Bombo Radyo kay Lt. Col. Anthony Gantang, pinuno sang Criminal Investigation and Detection Group (CIDG) Negros Occidental, ginpahayag sini nga ikaduha nga semana sang Mayo sang nakabaton sila sang reklamo batok kay Punong Barangay Romeo Sultan sang Brgy. Salamanca, banwa sang Toboso tuhoy sa anomaliya sa pagpanghatag sa SAP cash grant.
Suno kay Gantang, nagpadulong sa ila ang mga pumuluyo nga makabig kwalipikado sa ayuda apang wala nadala sa listahan.
Matapos ang pila ka semana nga imbestigasyon sang CIDG-Negros, napamatud-an nga kwalipikado gid man ang mga pumuluyo apang wala nadala sa lista samtang ang pila ka mga benepisyaryo nga nakabaton sang ayuda ang indi gid man matuod-tuod nga kwalipikado.
Bangud diri, natigayon nga mapasakaan sang kaso nga pagbayolar sa R.A. 3019 ukon Anti-Graft and Corrupt Practices Act; R.A. 11469 ukon Bayanihan to Heal as One Act; kag R.A. 6713 ukon Code Of Conduct And Ethical Standards For Public Officials And Employees.
Nagpanawagan man ang pinuno sa mga opisyales sang barangay nga wala sila sang may ginapaboran nga opisyal ukon politiko gani kinahanglan nga mangin tampad gid sa serbisyo.
