Nagpaandam na si Punong Barangay Deogracias Dela Vega sang Barangay Alijis, Bacolod City sa mga nagapanag-iya sang illegal structures sa iya nga barangay kadungan sa pagpadayon liwat sang road clearing operations.
Madumduman nga nagpagwa sang Memorandum Circular No. 2020-145 ang Department of the Interior and Local Government (DILG) nga nagamando sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation sugod Nobyembre 16, 2020 tubtob Enero 15, 2021.
Sa interview sang Bombo Radyo Bacolod kay Dela Vega, ginpahayag sini nga nagasugod na siya sa paglibot-libot sa ila barangay subong kag aminado ini nga may yara sang nagbalik nga mga road obstructions kaangay na lamang sang mga ginagmay nga baligyaan sa sidewalk.
Apang suno kay Dela Vega iya man ini naintindihan bangud sa kapigaduhon dala sang COVID-19 pandemic.
May anom naman ini nga natumod nga mga illegal structures sa ila nga lugar kun sa diin ang pader sang mga establisyemento ang nagalaksam sa dalan apang iya na ini ginatugyan sa city government.
Suno pa kay Dela Vega nga isa pa sini nga ginaproblema amo ang mga salakyan nga naga-park sa dalan.
Paathag sini, makapila ka bes naman niya ini nga ginapadangat sa Bacolod Traffic Authority Office apang kun kaisa indi gilayon marespondehan bangud sa kakulang sang manug-towing.
Suno sa punong barangay, magahatag siya sang isa ka semana nga plaso antes ang Nobyembre 16 agud nga mahitso sang mga tag-iya ang mga illegal structures kag road obstructions.
Pagkatapos sang warning suno kay Dela Vega, magasunod ini sa mando sang gobyerno nga liwat nga pagpanghawan sa dalanon.
Naga-apelar man ini sa mga pumuluyo nga magkooperar sa ginapatuman sang gobyerno bangud para man ini sa ikaayo sang tanan.
