Gin-athag sang punong barangay sang Barangay Alijis, ciudad sang Bacolod nga wala natabo sa puluy-an sini ang insidente nga pagluthang-patay sa ido nga Siberian Husky nga si Skittles.
Una diri, ginpahayag sang shooter nga si Dominador Bangero nga madamo ang nagakaon sa ila nga compound sang nagsulod kag nagwild si Skittles bangud birthday ni Punong Barangay Deogracias Dela Vega gani gintiro niya ang ido.
Sa interview sang Bombo Radyo kay Punong Barangay Deogracias Dela Vega, aminado ini nga sang Pebrero 20 ginselebrar sini ang iya kaadlawan kag nagpa-cater sa negosyante nga si Dominador Bangero.
Suno diri, posible nga bangod nga nagasinakuay ang catering group sang nagsinabad ang ido kag dala sa kainit ni Bangero, natiruhan sini si Skittles.
Pahayag ni Dela Vega, kaagahon pa lamang sang nagplastar sang mga bangko kag lamesa ang catering group kag gin-deliver ang pagkaon sang hapon nga suno diri posible nga diri man natabo ang insidente.
Gani, ginklaro lamang ni Dela Vega nga wala natabo ang pagluthang-patay kay Skittles sa puluy-an sini kag wala man siya sa compound nanday Bangero.
