BACOLOD CITY — Nagreklamo ang punong barangay sang Balaring, Silay City matapos nga ginbuyayaw kag ginhana nga sumbagon ni Silay City Mayor Mark Golez, Domingo sang hapon.
Sa interview sang Bombo Radyo, ginsaysay ni Punong Barangay Remy Roldan nga natabo ang insidente sa sulod mismo sang ila barangay hall kasunod sang aktibidad sang barangay kun sa diin saksi ang pila nila ka mga staff.
Si Roldan pa ang nag-introduce sa alkalde sa programa sang barangay apang pagkatapos sini, gin-istorya siya ni Golez sa sulod sang barangay hall.
Naakig ang alkalde bangud sa airconditioning unit nga ginpahulam sang pribado nga indibidwal sa barangay nga nagresulta sa pagsaka sang ila nga bill sa kuryente nga city government sang Silay ang nagabayad.
Malain nga mga tinaga ang ginhaboy ni Golez batok kay Roldan kag ginhana nga ini ang sumbagon apang sang ulihi, ginpulpog nalang sang alkalde ang iya kamot sa lamesa.
Naghingyo na sang pasaylo si Roldan sa iya nga kapaltahan sa paghulam sang aircon apang wala gid naumpawan ang alkalde kag padayon ang iya pamuyayaw.
Makaduha man sini ka beses nga ginhana nga sumbagon si Roldan.
Paandam sang alkalde kay Roldan, dapat nga indi na niya makita sa barangay hall ang airconditioning unit bangud kun yara pa, ipakaon niya ini sa punong barangay.
Kasunod sang insidente, ipakakas nalang ni Roldan ang amo nga airconditioning unit.
Kaangot sini, gin-athag ni Golez nga wala niya gintandog si Roldan.
Sa interview sang Bombo Radyo, ginpahayag ni Golez nga indi siya akig kay Roldan kundi akig ini sa ginhimo niya nga pagbaton sang airconditioning unit halin sa pribado nga persona.
Suno kay Golez, ang iya ginhimo kay Roldan ang kabahin sang iya pagdisiplina sa mga punong barangay ilabi na nga ang barangay hall sang Balaring ang iya sang city government kag ciudad man ang nagabayad sang bill sang kuryente.
Bangud sang presensya sang airconditioning unit suno kay Golez, nagsaka sa 15 mil pesos ang electric bill sang Balaring halin sa 5 mil pesos lamang sang una apang wala man lang ini sang courtesy sa iya opisina.
Suno sa alkalde, wala niya gintandog si Roldan kundi ginpulpog lang niya ang lamesa bilang kabahin sang pagpakita sang frustration sa ginhimo sini.
