Gin-athag sang punong barangay sang Barangay Banago, Bacolod City nga wala sini ginsugo ang nagpakilala nga volunteer nagikan sa ila barangay nga nagabulig kay-o sang pila agud nga indi magsal-utanay kag nagapanghatag sang numero sa mga nagapila agud nga makaparehistro bilang botante.
Una diri, pila ka mga residente sang Barangay Banago ang nagpahibalo sa Bombo Radyo Bacolod nga may nanghatag sang numero sa barangay kahapon nga amo ang ila gamiton kun magpila sa Robinsons Place sa Mandalagan nga nagaserbe nga registration center sang Comelec Bacolod.
Kagab-i pa lang, tuman na kalaba ang pila sa mall tubtub kaina sang kaagahon.
Sa interview sang Bombo Radyo Bacolod kay Punong Barangay Ricky Mijares, nagpanindugan ini nga wala siya sang may ginsugo agud nga ma-organize sang pila sang mga nagaparehistro sa Commission on Elections (COMELEC) para sa SK kag Barangay elections nga patigayunon sa bulan sang Disyembre.
Nagpanawagan man si Mijares sa mga pumuluyo nga ang indi magpati sa mga nagapanghatag sa ila sang numero kun indi ang nagikan sa Comelec ang magahatag sa ila.
Nagpanginwala man ini nga may yara sang quota ang tagsa ka barangay sa kadamuon sang mga botante.
