Ginpahayag sang Punong Barangay sang Barangay 12, Bacolod City, nga wala sang may matabo nga demolition sa barangay samtang wala pa sang masayluhan ang pumuluyo.
Madumduman nga ginpadal-an sang notice to vacate ang pila ka mga pumuluyo sang Barangay 12 kasunod sa development project sa Manokan Country.
Sa interview sang Bombo Radyo kay Punong Barangay JR Alcantara, natalana nga patigayunon ang demolisyon sa Lunes, Enero 8, 2024, apang, kahapon nagpatigayon sang paghinun-anon ang Barangay kay Bacolod City Mayor Alfredo Albee Benitez kag suno sa alkalde antes patigayunon ang demolisyon, I-identify kun pila ang final nga lista sang mga panimalay nga maapektuhan.
Sa inisyal nga lista, 36 ka pamilya ang apektado apang sobra diri ang numero sang apektado.
Suno kay Alcantara, hibaluon pa man kun tubtob sa diin ang malab-ot sang development project.
Samtang, bisan indi pa man matigayon ang demolisyon sa Enero 8, sa Enero 11 pagabutangan na sang kudal ang vendors plaza nga sakop man sang development project.
Sa bahin sang vendors plaza naman nga madamo sang nagatinir kag nagapangabuhi man didto, apang sila man ang pahalinon.
Sa karun, madamo sang mga pumuluyo sang Brgy 12 ang nagakabalaka, apang suno kay Alcantara nagpasalig na si Mayor Albee Benitez nga indi pagtandugon ang pumuluyo samtang wala pa sila sang masayluhan.
