Nangin matawhay ang pagbalik sa pwesto ni Punong Barangay Kim Piramo sang Baranay 19, ciudad sang Bacolod matapos ang anom ka bulan nga preventive suspension.
Ini matapos gin-turn over na sang nagpungko nga OIC punong barangay sa Barangay 19 sa elected punong barangay ang opisina matapos nga makabalik ini nagikan sa preventive suspension nga ginpapanaog sang Department of the Interior and Local Government (DILG).
Sa interview sang Bombo Radyo Bacolod kay Punong Barangay Kim Piramo, nagpasalamat ini sa Ginoo nga nangin matawhay ang pagturn-over sa iya sang opisina ni OIC Punong Barangay Angel Uberas.
Suno kay Piramo, gintawgan niya si Uberas kaina sang aga bangud ulihi na sini nakita ang text sa iya kahapon nga luyag siya nga tawgan.
Gintawgan ni Piramo si Uberas kaina sang aga pa kag ginpanugyanan nga patawhayan ang pagturn-over sang posisyon santo man sa mando sang DILG.
Nangin matawhay man ang pagturn-over ni Uberas sang opisina kay Piramo.
Madumduman nga kagab-i nagpahayag si Piramo nga wala sang plano nga magpanaog si Uberas bangud ginpanumdum sini nga sa Abril pa mabalik si Piramo.
Samtang, gin-umpisahan man nila ang pagturn-over sa misa nga ginpatigayon sa Sto. Niño Church.
Ginpasalamatan man sini ang mga kababainhan kag mga senior citizen sang barangay nga ginpangunahan ang preparasyon sa pagpatigayon sang misa.
Una na ginpakigbahin ni Punong Barangay Kim Piramo sang Barangay 19, Bacolod City nga natapos na ang ila nga 180 days preventive suspension sumugod subong nga adlaw, apang indi naman luyag magpanaog sa pwesto ang nagapungko nga officer-in-charge.
Suno kay Piramo, Setyembre 16 sang ginpapanaog ang ila nga 6 months preventive suspension nga natapos kahapon.
Suno pa diri indi man sila maglayo ni Uberas bangud ang magulang sini ang abyan man niya.
Suno kay Barangay Kagawad Angel Uberas, gintawgan siya sang iya magulang sa luwas sang pungsod nga magpanaog nalang sang matawhay kag ginsunod niya man ini bangud kun indi siya magpasugot nga siya man sa gihapon ang balikan sang DILG.
Natalana naman nga pormal nga iturn-over sini sa barangay ang mga dokyumento sang siya ang nagpungko sa sulod sang lima ka bulan agud mapamatud-an nga wala siya sang ginatago.
Sa karun magabalik na ini bilang barangay kagawad kag mapadayon man ini sa pagbulig sang dapat buligan sa barangay.
