Nagfile sang reklamo sa Ombudsman si Barangay 35 Kagawad Ronnie Albao batok kay Punong Barangay Ruben James Miranda kag sa mga kaalyado sini tuhoy sa pagfabricate sang minutes sang session kag iban pa nga mga dokumento.
Sa interview sang Bombo Radyo kay Kagawad Albao, ginpahayag sini nga halin sang bulan sang Marso tubtob Nobyembre, duha ka beses nakapatigayon sang session ang Barangay 35 apang may mga minutes sang meeting sa petsa nga wala man sila nakapatigayon sang pamulong-pulong kag ginapasa ini sa accounting office kaupod ang mga petty cash, reimbursement kag mga agenda nga wala man naistoryahan.
Suno sa iya, kun makapatigayon sila sang session, kun ano ang ila nahisugtan amo ini ang nakasulat sa ila hawid nga kopya apang sang nagrequest ini sang kopya sang ginsumite nga minutes kag lain na ang unod sang agenda.
Gindugang man sang kagawad nga may ginhatag nga P237,000 nga pondo ang Department of Labor and Employment sa barangay agud ibulig sa mga residente nga nadulaan sang pangabuhian bangud sa pandemic, apang sa 70 ka mga benepisyaryo, wala sang maskin isa sa ila ang nakabaton sang kwarta.
Gina-alegar man sini nga nag-offer pa sang tag P5,000 si Punong Barangay Miranda sa duha ka mga barangay kagawad nga kaalyansa sini.
Samtang, nagpanindugan naman si Punong Barangay Ruben James Miranda nga masami nga absent si Albao sa ila session rason kun ngaa wala ini nakahibalo sang minutes.
Suno kay Miranda, una sini nga ginpadal-an sang memo ang kagawad nga mangin kabahin sang contact tracing team apang nanghindi ini kag makabig nga bayolasyon sa mando sang Department of the Interior and Local Government (DILG).
Gindugang man sini nga si Albao lang ang kagawad nga sagay reklamo apang husto man magbaton sang benepisyo kag honorarium.
Handa naman si Miranda nga mag-atubang kay Albao subong man sa DILG agud mangin klaro ang tanan.
