Aminado ang punong barangay sang Barangay 7, Bacolod City nga may yara sang kabudlayan sa safety sang mga pumuluyo ilabi na kun may katalagman bangod sa nagaikit-ikit nga mga pamalay.
Sa interview sang Bombo Radyo kay Punong Barangay Hershey Sibug, kagab-i nagpadulong si Bacolod City Mayor Alfredo Albee Benitez kag iban nga mga councillors sa Barangay Villamonte gym nga temporaryo nga ginatiniran sang mga biktima sang sunog.
Suno diri, posible nga makabalik sa ila area ang iban nga mga pumuluyo apang ginalauman naman nga sa Miyerkules igatransfer sa Arao relocation site ang iban.
Bangod nga may bahin sang duta ang pribado, suno sa alkalde mas maayo kun magrelocate na lang sila sa Arao.
Pahayag ni Sibug, may kabudlayan sa safety sang pumuluyo ilabi na sa mga insidente nga indi malikawan bangod nga naga inikit-ikit ang mga balay nga human sa light materials.
Pahanumdom sini nga maghalong gid kun maggawi gamit ang kuryente ukon ano man nga butang may kaangatan sa kalayo.
