May panugyan ang punong barangay sang Barangay Banago, ciudad sang Bacolod sa mga residente sang barangay nga nangawat sang cell site batteries sa Mabinay, Negros Oriental kag nadakpan sa ciudad sang Bacolod sang Biyernes sang hapon.
Madumduman nga ang mga suspetsado ang nadakpan paagi sa joint operation sang Mabinay Municipal Police Station kag Bacolod City Police Office matapos nga nagbaligya sang cell site batteries sa junk shop sa Dalan Mabini, Barangay 25, Bacolod City.
Ginkilala ang mga ini kanday Erwin Aribato, 30-anyos, residente sang Purok Riverside, Barangay Banago; Romelyn Quiatchon, 26-anyos, residente sang Purok Mahimulaton, Barangay Banago; kag Joseph Villanueva, 30-anyos, residente sang Purok Kasagingan, Barangay Banago.
Suno kay Punong Barangay Ricky Mijares, kilala niya sa apelyido ang mga nadakpan apang indi niya personal nga kilala gid.
Suno diri, makilala niya ang ginikanan sang mga pamatan-on apang indi niya kilala ang mga natungdan.
Santo sa pag-usisa sang ila barangay tanod, isa sa ila ang yara sa drugs list sang Barangay Banago, samtang ang isa naman ang may criminal record sa Bacolod Police Station 3 bangud sa violation sang RA 9165 kag robbery.
Suno kay Mijares, wala siya sang mabulig sa mga nadakpan kundi dapat nga atubangon nila ang sala kag sabton kun ano ang silot.
Suno sa barangay official, gintinguhaan niya nga amat-amat nga mapapas ang mga kawatan sa Barangay Banago, samtang nagluntad naman ang krimen sa gwa sang Banago.
Nagpanawagan naman ini sa mga pumuluyo sang Barangay Banago nga untaton na ang illegal nga ginahimo kundi mangita sang legal nga palangabuhian.
