Nagpangayo sang kooperasyon ang Punong Barangay sa Barangay Sum-Ag, Bacolod City sa mga pumuluyo nga may ginapanag-ihayan nga kabahin na sang dalan nga maghalin na agud matapos ang Road Clearing Operation.
Suno kay Punong Barangay Rodney Carmona, ginhatagan sila sang deadline sang Depertment of Interior and Local Government (DILG) maykaangtanan sa memorandum natuhoy sa Road Clearing Operations nga ginmando sang National Government.
Nagahatag naman sila sang sulat kag paandam sa mga nagpanag-iya sang illegal structures.
Ginalauman naman nga matapos na nila ang mga nabilin pa nga anum ka panimalay sa San Juan St. sa masunod nga semana.
Pagadal-on naman nila ang mga ini sa Purok Arao kun diin ang mga ini ginpahanugutan nga mag-istar.
Samtang pahayag ni Carmona nga madamo pa sang mga yara sa dalanun sa highway padulong sa Sum-Ag National Highschool.
Pagapadulongan naman nila ini agud tsekyarun ang mga titulo agud matul-id kun wala pa ang mga ini mabayaran sang gobyerno.
May pila naman nga nakuha na, apang liwat nga nagapabalik gani ginpasalig ni Carmona nga magapabilin ang ila nga inspeksyon kag pagpangsaway kaangay nalang sa mga nagabaligya sa kilid sang highway sa dalan Araneta.
Santo sa assessment, kapin 97% na sang mga illegal structures ang napangkakas sang Barangay.
Nagalaom naman si Carmona nga bangod sa pag-untat sa Road Clearing nga ginsuguran kapin duha na ka tuig ang nakaligad, nga nakakita na sang masayluhan ang mga apektado nga pumuluyo.
