Mas luyag ni Punong Barangay Noli Villarosa sang Barangay Tangub, ciudad sang Bacolod nga dayunon ang eleksyon nga natalana sa Disyembre 5 subong nga tuig sangsa iisol ini sa Mayo 6 tuig 2024.
Kahapon, ginpahayag sang ginabati-bati nga mangin masunod nga House speaker nga si Leyte Rep. Martin Romualdez nga prayoridad nila ang pagpasar sang hagna nga magapostpone sang eleksyon sa tuig 2024 agud nga magamit ang pondo sa stimulus package nga igadihon sang Marcos administration.
Suno kay Villarosa, ang eleksyon ang paagi agud nga maislan ang mga barangay officials nga indi nagakaangay sa pwesto ilabi na kun wala nagakasugot ang punong barangay kag barangay kagawad kun sa diin apektado ang serbisyo sa mga pumuluyo.
Kun indi naman gusto sang mga pumuluyo ang punong barangay, sarang naman ini maislan sang mga residente.
Kun budget ang issue suno kay Villarosa, sarang ini mapangitaan sang paagi kaangay sang pagbuhin sa pondo sang magagmay nga proyekto.
