May panugyan ang punong barangay sang Barangay Tangub sa organizer sang MassKara Festival matapos nga gindeklarar nga 1st runner-up sa Street Dance and Arena Competition kahapon.
Suno kay Villarosa, wala ini sang dako nga expectation sa team sang ila barangay bangud luyag lang nila nga makapartisipar.
Suno diri, suportado niya ang maayo nga aktibidades sang ciudad sang Bacolod gani wala ini naglaom nga makasulod sila bilang runner-up.
Sang tinalikdan nga tuig, 5th placer ang Barangay Tangub gani tuman ang ila kalipay nga nagpangaduha sila subong nga tuig.
Nagpanugyan naman ini sa organizer nga Bacolod Yuhum Foundation nga sapulon ang mga punong barangay sa masunod nga tuig agud nga mapatigayon ang husto nga selection process kaangay sang named barangays nga may dako nga budget, indi kaangay sang numbered barangays nga limitado lang ang pondo.
Sarang naman suno sa iya macluster ang mga numbered barangays nga nagatulupad agud nga makatipon sang budget.
Suno sa barangay official, makaluluoy ang mga named barangays nga limitado ang budget gani limitado man ang katahum sang ila presentation.
Suno kay Villarosa, tuman kagasto ang pagpasakop sa Street Dance and Arena Competition halin sa costume, practice kag pamahaw sang mga dancers.
Sa kabug-usan, masobra P4 million ang nagasto sang Barangay Tangub sa ila nga partisipasyon apang malipayon ini bangud ginalagas nila nga makapresentar sang maayo nga performance.
Gintugyan naman sang Barangay Tangub sa ila nga choreographer kag trainer ang premyo nga nabaton agud nga matunga-tunga ini sang tululupong sang tanan nga mga dancers bangud wala na nagalagas ang barangay sang premyo bangud may pondo nga ginpain para diri.
