Ginarespeto sang punong barangay sang Barangay Zone 4-A sa ciudad sang Talisay ang desisyon sang iban nga mga barangay kag mga business establishments nga indi pagpasudlon ang iya mga pumuluyo.
Ini ang kasunod sang pagpositibo sa coronavirus disease 2019 sang isa ka 24 anyos nga babayi nga locally stranded individual nagikan sa Cebu.
Sa interview sang Bombo Radyo Bacolod kay Punong Barangay Remo Persia, ginpahayag sini nga discretion na sang iban nga mga punong barangay kun indi nila luyag magpasulod sang taga-Barangay Zone 4A sa ila nga lugar.
Suno diri, indi man sini mabasol ang iban bangud nga nagapangaman man lang ang mga ini sa virus.
Dugang pa ni Persia, iya man naintindihan ang amo nga desisyon sang iban nga mga barangay bangud kaangay sa ila, ginapili man lang nila ang makasulod sa ila lugar agud malikawan ang balatian.
Suno pa sa punong barangay nga nakadepende na sa mga residente kun ipatronize nila sa gihapon ang mga negosyo nga wala nagpahanugot sa ila nga makabakal.
Nagpanugyan man ini sa mga pumuluyo sang Barangay Zone 4A nga intindihon nalang nila ang sitwasyon kag indi maglain ang buot kag indi pagkabigon bilang isa ka diskriminasyon ang gina-eksperyensya nila sa karon.
Nahibaluan nga wala man nakapauli sa ila barangay si Negros Occidental Patient No. 15 bangud pag-abot sini sa Escalante port, gindiretso ini dala sa quarantine facility sang Talisay City kag ginsaylo na karon sa Provincial Healing Center sa EB Magalona.
Apang, nagpauli sa ila lugar ang tatay sang pasyente kag ang barangay kagawad nga nagsugat sa iya.
