Tun-an pa sang Punong Barangay sa Brgy Cansilayan, Murcia kaupod sa Municipal Environment Committee kun ano ang dugang nga mga rekomendasyon nga ipatuman sa tag-iya sang Taala Farm agud masolusyunan ang reklamo sang mga pumuluyo sa naga-alisngaw nga baho sang iti sang mga manok.
Sa interview sang Bombo Radyo Bacolod kay Punong Barangay Edgar Daquipil, nakaligad nga tuig pa sang mag-umpisa ang problema sa baho sang mga iti apang ini ang nasolusyunan man.
Pasalig sini nga indi man tayuyon ang pag-usbong sang baho, indi man adlaw-adlaw kag sa masami nagalawig lang sang 10 tubtob 15 minutos.
Paathag ni Daquipil nga sadto ginalubong sang Taala Farm ang mga iti, apang ginpahayag sang Department of Environment and Natural Resources (DENR) nga ini ang ginadumilian.
Ginrekomendar nga iproseso sang Taala Farm ang mga iti, kag himuon nga organic fertilizer.
Suno diri, napulo ka trucks sang iti ang gindeliver sa processing site kada adlaw gikan sa nagkalainlain nga Taala Farms.
Sadto, natumod nga ang problema amo ang pagtinamaran sang mga personnel kun sa diin kun may ma-usik gikan sa pag-unload sang mga truck, imbes nga tipunon kag dal-on sa processing area, ang mga iti ang ginapalapaw na lamang sang mga personnel sa pader.
Ini ang nagtambak naman sa gwa sang pader, kag sa pagbubo sang ulan ini ang nag-ilig panaog sa suba.
Gilayon nga ginpangkakas ni Mr Taala ang nasambitan nga mga personnel kag naggamit sang duha ka backhoe agud makuha ang higko sa suba.
Apang bangod indi gid masipot sang bakchoe, ginalantaw ni Daquipil nga ini ang rasun nga nagapabilin gihapon ang makaisa nga pag-alisngaw sang baho.
Suno sa Punong Barangay, ang proseso ang ginahimo naman sa iban nga lugar kag wala man sang problema, gani ginalantaw sini nga may sala lang sa proseso sang Taala Farm.
Sa pihak nga bahin, sa una nga reklamo, ginrekomendar naman sa mga ini ang pagtanom sang puno agud magserbe nga buffer zone, kag ang Taala ang nakatanom na sang 200 tubtob 300 ka mga puno, nga gindugangan pa sang mga kawayan.
Samtang ginpahanumdom naman nila ang pagdugang sang enzyme nga makapadula sang baho sang higko.
Plano ni Daquipil nga magsapol sa Municipal Environment Committee agud matun-an kun ano pa ang madugang sa mga dapat icomply sang Taala Farm, kag estoryahon man nila ang tag-iya sa masunod nga semana.
